سڪرنڊ ( رپورٽ : مشتاق سولنگي)
سڪرنڊ ويجهو ڳوٺ 21 دڌ ۾ شهباز ويلفيئر ايسوسيئيشن سڪرنڊ جي 28 سالگره جي خوشين ڀرئي موقعي تي سڪرنڊ پريس ڪلب جي نون چونڊجي آيل عهديدارن جي مان ۾ شاندار آجياڻو ڏنو ويو ، شهباز ويلفيئر ايسوسيئيشن جي سالگره جو ڪيڪ سڪرنڊ پريس ڪلب جي سرپرست محمد صديق منگيو ، صدر رائو عبدالمنان ۽ ٻين عهديدارن کان ڪٽرايو ويو۔
ان موقعي تي سرپرست اعلٰى محمد صديق منگيو ، صدر رائو عبدالمنان ، سنڌ سجاڳ فورم جي مجيد عباسي ، سنڌ ڪلچرل فورم جي صادق لاکو خطاب ڪندي چيو ته دوستن شھباز ويلفيئر ايسوسيئيشن جي 28 سالگره جي تقريب ۾ سڪرنڊ پريس ڪلب جي نون عهديدارن کي آجياڻو ڏئي خوشين کي ٻيڻو ڪري ڇڏيو آهي ، هنن چيو ته شھباز ويلفيئر 28 سال مسلسل منظم نموني سان بهتريءَ ۽ ڀلائيءَ لاءِ جاکوڙيندي پئي اچي جيڪو ان لاءِ اعزاز جو مقام آهي نه ته اڪثر تنظيمون ، فورم يا ايسوسيئيشنون تمام ٿوري وقت ۾ پنهنجو وجود وڃائي ويهنديون آهن۔
هنن شهباز جي ويلفيئر جي ورڪرن جي سچي لگن ۽ مخلصيءَ جي پڻ ساراه ڪئي . ان موقعي تي سڪرنڊ پريس ڪلب جي عهديدارن ۽ ميمبرن کي گلن جا هار پڻ پارايا ويا، تقريب کي وارث نوناري ، عبدالمالڪ نوناري ، عنايت نوناري ۽ ٻين پڻ خطاب ڪيو جڏھن ته اعجاز ڪيريو ، الھ رکيو سيال سميت وڏي انگ ۾ ماڻھن شرڪت ڪئي۔
