ڏوڪري: نامعلوم هٿياربند هٿان گولي لڳڻ سبب نوجوان فوت تفصيل موجب ڏوڪريءَ ۾ هٿياربندن جي فائرنگ ۾ زخمي ٿيندڙ نوجوان کي طبي امداد لاءِ لاڙڪاڻي جي هڪ اسپتال نيو ويو، ڏوڪريءَ ۾ سوڀو چونڪ وٽ موٽر سائيڪل سوار هٿياربندن فائرنگ ڪري ڏني، فائرنگ جي نتيجي ۾ ڳوٺ مڱياڻي جوڻيجا جو رهواسي 28 ورهين جو نوجوان جاويد علي جوڻيجو سخت زخمي ٿي پيو۔
زخميءَ کي شهرين پاران ڏوڪري اسپتال آندو جتي سندس حالت ڳڻتي جوڳي هئڻ سبب لاڙڪاڻي جي چانڊڪا اسپتال نيو ويو، زخمي نوجوان جاويد جوڻيجو زخمن جا سور نه سهندي لاڙڪاڻي جي اسپتال ۾ فوت ٿي ويو۔ فوتي جو مڙھ ڳوٺ پهچڻ تي ڪهرام مچي ويو، واقعي جا ڪارڻ معلوم نه ٿي سگهيا آهن، جڏهن ته جوابدار پڻ واقعي واري جڳھ تان فرار ٿيڻ ۾ ڪامياب ٿي ويا آهن۔
