لاہور: پنجاب کے مختلف علاقوں میں بارش کے باعث مکانات کی چھتیں اور مٹی کے تودے گرنے سے 17 افراد جاں بحق جب کہ متعدد زخمی ہوگئے۔
تفصیلات کے مطابق لاہور کے علاقے ہربنس پورہ کی ابراہیم کالونی میں مکان کی چھت گرنے سے 4 افراد جاں بحق اور خواتین سمیت 5 افراد زخمی ہو گئے، جاں بحق افراد کی شناخت صابر، کامران، اعظم اور اسلم کے نام سے ہوئی ہے جب کہ زخمیوں میں حبیب اللّٰہ، ساحل، قمر بی بی، فاطمہ اور فریدہ بی بی شامل ہیں۔
جبکہ شیخوپورہ میں مرید کے روڑ پر واقع ملیاں کلاں میں بارش کے باعث افتخار نامی شخص کے مکان کی چھت گرنے سے 9 افراد ملبے تلے دب گئے۔ واقعے میں ایک بچہ اور ایک خاتون جاں بحق جب کہ 7 زخمی ہوگئے۔
جڑانوالہ کے تھانہ صدر کی حدود میں واقع گاؤں چک نمبر119 گ ب میں خستہ حال چھت گرنے سے ارشد نامی شخص جاں بحق ہوگیا۔ فیصل آباد میں کرنٹ لگنے کے مختلف واقعات میں 2 افراد زندگی کی بازی ہار گئے۔
دوسری جانب پھالیہ میں شدید بارش کے باعث مکان کی چھت گرنے سے ماں اور 4 بچے جاں بحق ہوگئے۔ جاں بحق ہونے والوں میں 33 سالہ رقیہ ، 8 سالہ سارم معاویہ، 5 سالہ عاتکہ عافیہ ، 3 سالہ محمد عمر اور 2 سالہ محمد حاشر شامل ہیں۔
