پاکستان کرکٹ بورڈ نے سابق کپتان یونس خان کو بیٹنگ کوچ مقرر کردیا۔
سابق کپتان یونس خان کی تقرری آئی سی سی ٹی 20 ورلڈ کپ 2022 تک کے لیے کی گئی ہے۔
اس سے قبل یونس خان نے دورہ انگلینڈ میں بھی قومی کرکٹ ٹیم کے بیٹنگ کوچ کی حیثیت سے ذمہ داریاں ادا کیں تھیں۔ سابق کپتان اب دورہ نیوزی لینڈ میں بھی یہی ذمہ داریاں نبھائیں گے۔ پاکستان کرکٹ ٹیم 23 نومبر کو نیوزی لینڈ کے لیے روانہ ہوگی۔
قومی کرکٹ ٹیم کی عدم مصروفیت کی بنا پریونس خان حنیف محمد ہائی پرفارمنس سینٹر کراچی میں بیٹنگ کوچ کی حیثیت سے کام کریں گے۔
یونس خان نے 118 ٹیسٹ میچز میں 10099جبکہ 265 ایک روزہ انٹر نیشنل میچز میں 7249 اور 25 ٹی 20 انٹر نیشنل میچز میں 442 رنز اسکور کیے۔ انہوں نے پاکستان کی جانب سے سب سے زیادہ 34 ٹیسٹ سنچریاں بنائیں ۔ ان کا بہترین اسکور 2009 میں کراچی میں سری لنکا کے خلاف 313 رنز تھا۔
