مریم اورنگزیب کا کہنا ہے کہ شبلی فراز صاحب اپنا استعفیٰ لکھنا شروع کردیں۔
گوجرانوالہ میں میڈیا سے مختصر گفتگو میں پاکستان مسلم لیگ ن کی ترجمان مریم اورنگزین کا کہنا تھا کہ گوجرانوالہ اسٹیڈیم رات کو ہی بھرنا شروع ہوگیا تھا۔
اس موقع پر انہوں نے وفاقی وزیر اطلاعات و نشریات شبلی فراز کے چیلنج پر ردعمل دیتے ہوئے کہا کہ شبلی فراز صاحب اپنا استعفا لکھنا شروع کردیں۔ مشکل ہو تو استعفے کا متن بھی مہیا کیا جا سکتا ہے۔
انہوں نے کہا کہ عمران صاحب عوام نے جلسے سے ایک رات پہلے آپ کا استعفا لکھ دیا ہے۔
مسلم لیگ ن کے رہنماؤں نے جمعرات 15 اکتوبر کو رات گئے گوجرانوالہ میں پنڈال کا دورہ کیا۔ لیگی رہنما عطاﷲ تارڑ نے ٹوئٹر پر رات گئے اسٹیڈیم میں لیگی کارکنوں کی ویڈیو بھی شیئر کی۔ وڈیو میں مریم اورنگزیب، رانا ثناء ﷲ سمیت دیگر قائدین بھی موجود تھے۔
واضح رہے کہ وفاقی وزیر اطلاعات شبلی فراز کا کہنا تھا کہ اپوزیشن کو چیلنج کرتا ہوں کہ اب جناح اسٹیڈیم بھر کر دکھائیں۔ اپوزیشن لیڈر شپ کرپشن بچاؤ کے لیے مجمع اکٹھا کر رہی ہے، فیملی لمیٹڈ کمپنی مال بچانے کے لیے سڑکوں پر آئی ہے۔
