پاکستان کرکٹ ٹیم کے بیٹنگ کنسلٹنٹ یونس خان نے ٹیم میں تجربہ کار سینیئرز کی موجودگی کی حمایت کردی۔
مانچسٹر سے ویڈیو کانفرنس پر میڈیا سے گفتگو کرتے ہوئے یونس خان نے کہا کہ ان کے دور میں بھی ایسی باتیں ہوتی تھیں کہ فلاں کھلاڑی کی عمر زیادہ ہوگئی ہے، اگر ایک کھلاڑی تجربہ کار ہے، وہ فٹ ہے اور اسکور بھی کررہا ہے تو اس کو کوئی کیوں ڈراپ کرے گا؟
انہوں نے کہا کہ وہ ذاتی طور پر جوان خون کی شمولیت کے حق میں ہیں لیکن ٹیم کمبی نیشن سینیئر اور جونیئرز پر مشتمل ہونا چاہیے، نئے کھلاڑیوں کی باتیں تو سب ہی کرتے ہیں لیکن کیا گارنٹی ہے کہ نیا کھلاڑی بھی فیل نہیں ہوگا۔
یونس خان نے اسد شفیق کی بھی حمایت کی اور کہا کہ کبھی کھلاڑی انڈر پریشر ہوتا ہے اور اس کو ایک اننگ درکار ہوتی ہے جس کے بعد سب کچھ ٹھیک ہوجاتا، اسد کے پاس موقع تھا کہ مانچسٹر میں دوسری اننگز میں ایسی اننگز کھیل جاتا لیکن بدقسمتی سے وہ رن آؤٹ ہوگیا، وہ اچھا اور تجربہ کار بیٹسمین ہے، امید ہے جلد ری کور کرجائے گا۔
