ترجمان سندھ حکومت مرتضیٰ وہاب نے کہا کہ کرپشن اور تحریک انصاف لازم و ملزوم ہیں، پی ٹی آئی کے بغیر آپ کرپشن کا لفظ لکھ نہیں سکتے اور اب وقت آ گیا ہے کہ تحریک انصاف کی کرپشن کے خلاف تحقیقات اور کارروائی ہونی چاہیے۔
کراچی میں میڈیا کے نمائندوں سے گفتگو کرتے ہوئے مرتضیٰ وہاب نے کہا کہ سندھ حکومت نے ٹھٹہ میں کاٹھور کے علاقے میں کھجور کے پودے کو لگانے کا عمل شروع کیا اور وہ پودے تناور درخت میں تبدیل ہو چکے ہیں جو پھل دے رہے ہیں یعنی پاکستان میں اب کھجور پیدا ہونا شروع ہو گئی ہے۔
ان کا کہنا تھا کہ چین اور تھائی لینڈ سے آنے والے تکنیکی ماہرین انہوں نے ٹھٹہ جا کر تجزیہ کیا اور ان کا کہنا ہے کہ ان درختوں کا معیار ملائیشیا کے عین مطابق ہے۔
